गैंडाकोट, जेठ २८ । गैंडाकोट पम्पिङ स्किम खानेपानी तथा सरसफाई उपभोक्ता संस्था (गैंडाकोट-४) को आसन्न निर्वाचनको मिति नजिकिएसँगै चुनावी सरगर्मी निकै बढेको छ। संस्थालाई थप गतिशील, प्रविधिमैत्री र उपभोक्तामुखी बनाउने स्पष्ट मार्गचित्रसहित सामाजिक क्षेत्रमा सक्रिय व्यक्तित्व लक्ष्मी घिमिरे पाण्डेले खुल्ला महिला सदस्य पदमा आफ्नो सशक्त उम्मेदवारी घोषणा गरेकी छन्।
“स्वच्छ पानी, सफल जिन्दगानी” र “उपभोक्ताको विश्वास र प्रतिबद्धता” लाई मुख्य चुनावी मन्त्र बनाएर चुनावी मैदानमा उत्रिएकी गैंडाकोट-२ निवासी पाण्डेको उम्मेदवारीले उपभोक्ताहरूमाझ नयाँ उत्साह थपेको छ।
व्यावसायिक उचाइ र ऐतिहासिक सफलता
लामो समयदेखि जीवन बीमा क्षेत्रमा निरन्तर र निष्ठापूर्वक उत्कृष्ट सेवा प्रदान गर्दै आएकी पाण्डे नेपालकै अग्रणी महिला बीमा अभिकर्ता हुन्। आइएमई लाइफ इन्स्योरेन्स कम्पनी लिमिटेडमार्फत देशकै उत्कृष्ट व्यवसाय गर्दै उनले हालै मात्र “Mt. Everest Leaders’ Club 1st Achiever” को गौरवपूर्ण ऐतिहासिक उपाधि हासिल गरेकी छन्। व्यावसायिक क्षेत्रमा उनले प्राप्त गरेको यो अन्तर्राष्ट्रिय स्तरको सफलता सिंगो गैंडाकोट क्षेत्रकै लागि गर्वको विषय बनेको छ।
यही व्यवस्थापकीय कुशलता र उच्च व्यावसायिक अनुभवलाई अब खानेपानी संस्थाको हित र उपभोक्ताको सेवामा लगाउने उनको दृढ संकल्प रहेको छ।
यस्ता छन् लक्ष्मी घिमिरे पाण्डेका मुख्य उपभोक्ता-केन्द्रित योजनाहरू:
सुलभ र झन्झटमुक्त पारदर्शी सेवा: संस्थाको प्रशासनिक कार्यलाई पूर्ण रूपमा डिजिटल र पारदर्शी बनाउँदै उपभोक्ताले पाउने सेवालाई झन्झटमुक्त र सरल बनाउने।
सुलभ दरमा स्वच्छ खानेपानी: प्रत्येक घरधुरीमा २४ सै घण्टा शुद्ध र सुरक्षित पिउने पानी पुर्याउन प्राविधिक सुधारमा जोड दिने।
गुनासो सुनुवाइ संयन्त्र: उपभोक्ताका समस्या र गुनासोहरूलाई तत्काल सम्बोधन गर्न ‘द्रुत सेवा केन्द्र’ (Quick Response System) को अवधारणा अघि सार्ने।
नेतृत्वमा महिला र उपभोक्ताको सहभागिता: संस्थाका हरेक नीति निर्माण र निर्णय प्रक्रियामा आम उपभोक्ता, विशेष गरी महिलाहरूको आवाजलाई बलियो रूपमा प्रतिनिधित्व गराउने।
विशुद्ध सामाजिक सेवाको भावना
व्यावसायिक रूपमा स्थापित भइसकेकी पाण्डेको यो उम्मेदवारी कुनै व्यक्तिगत स्वार्थका लागि नभई विशुद्ध सामाजिक रूपान्तरण र उपभोक्ताको हकहितका लागि भएको स्थानीय बुद्धिजीवीहरूको बुझाइ छ। धार्मिक, सामाजिक तथा सहकारी अभियानहरूमा समेत उत्तिकै योगदान पुर्याउँदै आएकी उनी स्थानीयस्तरमा लोकप्रिय र विश्वासिलो अनुहार मानिन्छिन्।
संस्थालाई नयाँ उचाइमा पुर्याउन र उपभोक्ताको घर-घरमा स्वच्छ पानीसँगै स्वस्थ जीवनको ग्यारेन्टी गर्न आफूलाई अमूल्य मतदान गरी विजयी गराउन पाण्डेले आम उपभोक्ताहरूसमक्ष हार्दिक अपिल गरेकी छन्। उनको यो उम्मेदवारीसँगै गैंडाकोट पम्पिङ स्किमको निर्वाचन थप रोचक र परिणाममुखी हुने अपेक्षा गरिएको छ।
सम्बन्धित खवर
